Mt. Bulusan, liwat na nagbuga nin abo kasuudma

Liwat na nagbuga nin abo an bulkan Bulusan kasuudma (Okt. 2)

Segun sa Philippine Institute of Volcanology & Seismology (PHIVOLCS) an siring na aktibidad naerehistro poco mas o menus alas 6:50 nin pagkaaga asin nagdurar nin sagkod alas 12:40 nin odto.

Uminabot nin haros 200 metros an itinuron na abo na huminogpa sa mga barangay kan San Rafael, San Roque asin San Jose sa municipio kan Bulusan.

Nakadangog man nin pagdagondong o rumbling sound an mga residente sa Brgy. San Roque kasabay kan pagsungaw nin asupre sa palibot.

Kinompirmar man kan PHIVOLCS na nakapagrehistro sinda nin 6 na mga pagyogyog o mga volcanic earthquakes sa nakalipas na 24 oras

Sa ngonian, mantenidong nakabandera an alert level 1 sa palibot kan Bulkan Bulusan