Grade 9 student, gadan kan masagasaan nin truck sa Panlayaan

Gadan an sarong grade 9 student kan Panlayaan Technical Vocational School makalihis ining mabangga asin masagasaan kan sarong truck

Sa report kan Sor. City Police, an siring na insidente nangyari poco mas o menus alas 12:35 an pagkaodto, Okt. 18 sa kahalabaan kan Maharlika Highway, sa Brgy. Panlayaan, West District, Sorsogon City kun saen an biktima binistong si Joselito Janapin Lasin, 20 anyos, soltero asin residente kan Brgy. San Isidro, West District, Sorsogon City

Sa inisyal na imbestigasyon kan mga otoridad naglolowas na nag-overtake si Lasin lunad kan pigmamanehong motorsiklo sa sarong Isuzu Forward truck na pigmamaneho ni Marcos Gabiana Solayao Jr., 33 anyos kan Brgy. Canlapwas, Catbalogan, Western Samar alagad dae kaini nakarkulo an dalagan na nagresulta tanganing aksidenteng makabunggo sa atubangan na goma kan truck na nagresulta tanganing mahulog ini sa sasakyan asin magulungan kan truck

Boluntaryo man na nagsuko sa pulisya an driver kan truck mantang tulos na binawian nin buhay an biktima

Sa banwaan kan Sta. Magdalena, lugadan an 30ng pasahero kan sarong pampasaherong jeep matapos ining maaksidente kasuudmang aga, Okt. 18 sa Purok 2, Brgy. San Eugenio, Sta Magdalena, Sorsogon

Sa report kan PNP, nawaran nin kontrol si Ramon Sadsad kan Brgy Lalud, Bulusan Sorsogon sa pigmamanehong Isuzu Passenger Jeepney with plate no. EVP 258 na nagresulta tanganing makabunggo ini sa poon nin mangga

Sa inisyal na imbestigasyon kan mga otoridad naglolowas na pigbabalatas kan nasambit ng jeep an kalahabaan kan Maharlika highway gikan sa Brgy. San Bartolome, Sta Magdalena, Sorsogon asin pasisiring sa Sorsogon City kan mangyari an siring na insidente

Sa ngonian pinagtatawan nin atensyon medikal sa Irosin District Hospital asin Sorsogon Provincial Hospital an nagkapirang lunad na pasahero kan nasambit ng jeep

Lugadan man an sarong 29 anyos na soltero makalihis ining aksidenteng mabunggo poco mas o menus alas 6 an banggi sa kahalabaan kan Maharlika Highway sa Brgy. Guinlajon, West District, Sorsogon City

Segun sa Sor. City Police, aksidenteng nabunggo kan sarong Mitsubishi Adventure na pigmamaneho ni Jose Epino Espineda Jr., 43 anyos kan Brgy. Carriedo, Gubat, Sorsogon an biktimang si Hernan Ligson Labayani kan Flores St., Brgy. Piot, Sorsgon City

Tulos man na dinara sa ospital an biktima mantang boluntaryong nagsuko sa pulisya an suspect

Mientrastanto, nabawi kan sarong empleyado kan NFA an saiyang nawawarang motorsiklo matapos na maimbwelto ini sa aksidente sa behikulo

Sa report kan pulisya, personal na nagpasiring sa hepatura si Hermie Gratuito Labayo, 63 anyos kan Sitio Madarag Brgy. Guinlajon, Sorsogon City tanganing ireport na an saiyang Honda XRM 110cc, color green/gray, plate no. 2290 ES, engine no. KPG00E045020 asin chassis no. KPG00045013, nawawara

Sinabi ni Labayo, ipinarada sana niya sa lowas kan saindang harong an motorsiko poco mas o menus alas 8 an banggi kan Okt. 15 alagad pagmata niya, nawawara na ini

Dahilan kan siring na bagay, tulos na nag-alerto an mga awtoridad sagkod sa makarecibe nin impormasyon dapit sa nangyaring vehicular accindent sa Maharlika Highway sa Brgy Esperanza, Pilar, Sorsogon na kinasasabitan kan nawawarang motorsiklo

Sa inisyal na imbestigasyon kan mga otoridad naglolowas na pigmamaneho an nasambit ng motor kan sarong menor de edad asin kaangkas man an backrider na minor

Dahilan kaini, pinaghahanda na kan pulisya an magkakanigong kaso na isasangat kontra sa dowang menor de edad na sinasabing responsable sa panghahabas kan motorsiklo