Bakasyon kan mga taga-Sorsogon ngonian na weekend, ekstendido

Magiging halawig an bakasyon kan mga tagaSorsogon ngonian na weekend

Sa ipinalowas na Exec. Order No. 009 ni Sorsogon Provincial Gov. Robert Lee Rodrigueza, deklaradong holiday sa Lunes, Okt. 17 dahilan sa pagkomemorar sa pagkaka-establiser asin founding anniversary kan Sorsogon

Pinagdereheran ni Gov. Lee an gabos na empleyado sa probinsya kasabay na an mga lokal asin elehidong opisyal na magsabay, maghiling asin magpartisipar sa mga nakalinyadang aktibidades kan Kasanggayahan festival

Kasabay sa mga nakalinyadang aktibidad ngonian na taon iyo an Pantomina sa Tinampo, Historico Cultural Parade, Drum & Lyre Competition, Si Bulusan nan si Agingay Stage Play, re-enactment kan Primerang Misa sa Luzon, Lunad sa Balod asin ibapa.

Mientrastanto, kinompirmar ni Marclet Villapando na apektado an nagkapirang aktibidad sa Kasanggayahan dahilan sa bagyong si Karen

Imbes kasuudma, Okt. 14, ipinagtalaan sa aga an borobangging kaogmahan o beer plaza sa rompeplas o Sorsogon pier

Sa ibong kaini, kompiado si Villapando na magiging magayon na an kondisyon nin panahon digde sa Sorsogon sa Lunes kun saen gigibohon an darakulang aktibidad may relasyon sa pagromdom sa pagkakatalingkas kan Sorsogon gikan sa probinsya kan Albay