Magkasunod na shooting incident naerehistro kasubanggi

2 magkasunod na insidente nin pambabadil an naerehistro kasubanggi kan Sorsogon Police Provincial Office.

Sa report kan SPPO, primerong naerehistro an siring na shooting incident, alas 9:50 kasubanggi sa Brgy. San Julian, Irosin, Sorsogon.  

Pinagbisto ni PCI Edwin C Adora, pamayo kan Irosin PNP an biktima na si Darhyl Bataller Paraiso, 19 anyos, soltero asin residente kan Brgy. Mambog, Malolos,Bulacan.

Sa inisyal na imbestigasyon kan mga otoridad naglolowas na mantang nagsasara kan pigbabantayan na tindahan an biktima kan mag-agi an suspect dangan na buminalik asin basang na sanang binadil si Paraiso na nagsuprer nin mga tama nin bala sa saiyang tulak

Linapag pa kuta na kan ama kan biktima an dae bistadong suspetsado alagad marikas ining nakadulag

Deklaradong dead on arrival si Paraiso na naidalagan pa sa Irosin District Hospital

Segun sa mga testigo, an dae bistadong suspetsado iyo an nakasulot nin black and red polo shirt, short pants, may langkaw na 5’2 to 5’3, may katabaan, medyo bilog an pandok asin dark skin.

Sa ibong na lado, nakua sa pinangyarihan kan krimen an 3 pidaso nin fired cartridge gikan sa Cal. 22 pistola

Sa magkaseparar na insidente, lugadan an sarong persona matapos na badilon sa sarong baraylehan, bisperas kan barangay fiesta sa Brgy. Paghulaban, Barcelona, Sorsogon.

Segun kay PSI Edwin Apun, pamayo kan Barcelona PNP, an siring na insidente nangyari poco mas o menus alas 11:45 kasubanggi kun saen an biktima binistong si Onel EspaƱo, nasa tamang edad asin residente kan Brgy. Putiao sa kaparehong banwaan

Sa imbestigasyon kan pulisya naglolowas na nakadangog na sana nin putok nin badil sa nasambit ng baraylehan sagkod sa mahiling na nakabulagta na an biktima na may tama sa saiyang payo gikan sa dae pa madeterminaran na kalibre nin badil

Tulos na pinagdalagan sa Gubat District Medical Hospital dangan na pinagtransfer sa Sor. Provincial Hospital an biktima para sa magkakanigong atensyon medikal

Sa ibong na lado, padagos na pinaghahanap kan mga awtoridad an suspetsadong si Furio Gayta alias Junior, nasa tamang edad asin residente kan Brgy Panghaluban, Barcelona, Sorsogon  na sinasabing responsable sa pambabadil